OTXANDIO: Euskaraz Bizi Eguna

==========================================================
OTXANDIOn egingo da aurtengo EUSKARAZ BIZI EGUNA apirilaren 18an
==========================================================

http://www.euskalherrianeuskaraz.org
Izan, egin eta eraginez, euskararen alde egotetik alde egiterako urratsa egiteko deia egin du eragile euskaltzaleak.
Aurten seigarrenez egingo den Euskaraz Bizi Eguna hartuko du Otxandiok apirilaren 18an. Euskararen alde egotetik euskararen alde egitera leloa eramango du egitasmoak eta herriko eragileekin elkarlanean sortutako egun osorako egitarau zabalaz gain, Luhartz, Gozategi eta Governors taldeen kontzertuak izango dira.

http://www.naiz.eus
Euskal Herrian Euskarazek Otxandion ospatuko du aurten ‘Euskaraz Bizi Eguna’, goizean goizetik hasi eta egun osoan zehar luzatuko da jaia. Aurrerapen modura aldarrikapen egunean parte hartuko duten herritar eta eragileek argazki bateratua egin dute Otxandion bertan. «Euskararen alde egoteaz gain, euskararen alde egiteko prest dagoen herria» da EHEren esanetan eta hori bera azpimarratu dute gaurko agerraldian, «egotea ez da nahikoa; egin egin behar dugu».

9.00etan Mirugain mendi-taldeak antolatuta mendi-irteera izango da. Goizean zehar kantu-poteoa, txistulariak eta Urdaz Magunazelaia harri-jasotzailearen erakustaldia antolatu dituzte. Gainera, erakustaldi berezia ere izango da, antzarrak protagonista dituen erakustaldia antolatu baitute. Txikienentzat puzgarriak, tailerrak eta jolasak izango dira eta 14.00etan izango da ekitaldia. 500 bat lagunentzako bazkaria aurreikusi dute antolatzaileek eta bazkalostean Gibelurdinek taldeak girotuko du giroa.

Arratsalde eta iluntze partean ere jai giroa izango da eta amaiera Luhartz, Gozategi eta Governors taldeen kontzertuarekin iritsiko da. Oraindik festarako gogoz direnentzat, DJ Elepunto-ren emanaldia izango da gaztetxean.

LHRTZ Erromeria